د پښتني بانک د عامل پلاوی مشرتابه ښاغلي الحاج حافظ غلام اسحاق او د افغانستان اسلامي آمارت د علومو اکاډمۍ د استازو سره لیدنه
څرنګه چې د افغانستان اسلامي آمارت له لورې د هېواد پر لوېشت، لوېشت خاوره او د ژوندانه په هر اړخ کې د اسلام د مبین دين د ارشاداتو مطابق بشپړه اسلامي واکمني نافذه ده، د دغه اصل له مخې د اسلامي آمارت مشرتابه، مروجه سودي بانکولي لغوه او پرځای یې د اسلامي بانکوالۍ چې په نړیواله کچه د سوداګرۍ او ټولنو د پرمختګ په برخه کې تر نورو بانکي سیسټمونو اغېزمنه ده، د فعالیدو او ترویج په موخه کلکه سپارښتنه شوې ده.
پښتنې بانک هم اسلامي ارشاداتو ته د انعقاد او اسلامي امارت مشرتابه پرېکړو ته د اطاعت پر بنیاد په خپلو بانکي چارو کې سودي راکړه ورکړه په ټولیز ډول درولې او پرځای یې د اسلامي بانکولۍ د پنځ او ترویج لپاره خپلې هلې ځلې پیل کړي دي، چې په دغه لړ کې د 1401 کال د لړم میاشتې په 19 نېټه د دې بانک د عامل پلاوي مشر الحاج حافظ غلام اسحاق او د افغانستان اسلامي آمارت د علومو اکاډمۍ د استازو ترمنځ ابتدائي ناسته ترسره او د اسلامي بانکوالۍ د ترویج پر اړوندو مسائلو ګټور بحث ترسره شو. پښتنې بانک ژمن دی چې په نږدې راتلونکي کې به د بشپړې اسلامي بانکولۍ پر مټ د هېوادوالو او سوداګرو چوپړ او د ملي اقتصاد په پیاوړ تیا کې خپل رغنده رول لوبوي.
